5amsa snin men Kais Saied

Fi 5iteb b monesbet edhdhikra 69 l 3id ejjomhouriya, tenchar 3la essaf7a errasmiya lel ittihed, Slaheddine Selmi taleb b moraja3et essiyaset el3oumoumiya wel5iyarat el i9tisadiya. 9al elli no9s elme9dra echcheryiya w ghla2 elma3icha w tadahwor elmarafe9 el3oumoumiya, fessa77a wetta3lim wenna9l wedhdhaw welma wel adwiya wessnadi9 el ijtime3iya, ma3neha azma 3ami9a. Rfadh ettafwit ejjoz2i wella elkolli felmo2assaset el3oumoumiya w talab 3awdhou el istithmar wel isla7. W cheff elli ettasarrof fechchen el3am blech tcheawor kefi m3a elmounadhdhamet elwataniya welmojtama3 elmadani ma y7allch elmachakel, w taleb b tad3im el7iwar.

Wa9t ista9bel nhar 20 juillet fi Carthage rayset el7oukouma w louzir el i9tisad w mo7afedh la Banque Centrale, 3la 9anoun elmosadara 3la mo5attat ettanmiya 2026-2030, Kais Saied 9al elli eddyoun trekmet blech ma echcha3b ettounsi yestafed menha, w elli Tounes waffet b koll iltizemetha blech ta25ir fel5las. Taleb bech tet7awwal eddyoun hedhi l istithmarat bech tet3awed bina elmarafe9 el3oumoumiya.

”La Tunisie a honoré tous ses engagements et n'a accusé aucun retard dans le remboursement de ses obligations”Tounes waffet b koll iltizemetha w ma ta255aretch 7atta marra fi 5las dyounha

Fi jalsa 3amma nhar 27 juillet 3la 9assan elma wedhdhaw, Brahim Bouderbala 9al lezem netjewzou el azma bel i3timed 3la mo2assaset eddawla w in5irat elmwatnin. Chaddad 3la isla7at jedhriya, b 5tott 3amal 3la elmada el9sir w istratijiya chemla 3la elmada elmotawassat welb3id. Taleb enness ma yestaslmouch letteche2om, w dhakkar elli bilden o5ra 3addew azmat kifha w nhadhou b 7osn ettasarrof.

Fi ejjalsa el3amma lettadewol fechchen el3am nhar 27 juillet, Ammar Aidoudi inta9ad elli sammeh traje3 dawr elmo2assasa elbarlameniya, w ittaham essolta ettanfidhiya elli ma tetfe3alch m3a elmajles w ma ta5odhch b mo9tara7at ennowweb 3la mchaghel ejjihet. 9al elli ennowweb wallew mhammchin, w elli edda3wat elmwajjha l ra2is ejjomhouriya bech yzour jihet de5liya b9at blech radd. W cheff elli mo5attat ettanmiya ma istejebch l tatallo3at ejjihet eddekhliya w karras el7if fi tawzi3 elmachari3, 5assatan fi wileyet Kasserine, w elli 3adad men machari3ou seba9 w t3allnou. 9al elli el3adela el ijtime3iya wejjihwiya wettawzi3 el3adel lethharwet ma t7a99a9ouch, w taleb b moraja3et el5iyarat ettanmawiya.

Hamza Meddeb ye7ki 3la ra9aba fi koll plassa, w y9oul elli elmwechi 9a3da tmout, welmata3em tsakker, wel mortha y3aniw, w kbar essann menhom elli ymoutou. Al Jazeera t9oul elli etta9ti3 yousel l thnach se3a.

”That anger has to go somewhere and it's being aimed at the state-owned electricity and water companies, sometimes it's aimed at the government, but never at the one figure who has control: the president.”Elghadhab hedha lezmou yemchi l plassa, w houwa raye7 lecharikat el3oumoumiya mte3 edhdhaw welma, w se3at lel7oukouma, ama 3omrou ma yemchi lecha5s elwa7id elli fi yeddou el9arar : erra2is.

Ki 9addem 9anoun elmaliya 2026 fi youm i3lemi fi Tounes nhar 8 janvier 2026, Mohamed Louzir 7adhdher elli elmandhouma ejjibeyiya bdet tousel l 7doudha. Wasaf el9anoun belmobtaker, 3la wajh esso5riya : fih 110 fasl, nosshom i9tar7ouhom ennowweb, w yefredh ziyedet fel ojour bel9anoun 3iwadh ma y5alliha lettafawodh bin enni9abat wel a3raf. W 3la el ada 3la el9ima elmodhafa 3amal 7seb : b neteb tijeri m9adder b132 melyar dinar w nesba motawassta 15 %, eddawla lezem t7assal 9rib 20 melyar dinar, ama elmarbou7 el7a9i9iya wa9fa bin 11 w 12 melyar.

”Cependant, le système fiscal commence à atteindre ses limites, avec une pression fiscale désormais comparable à celle de nombreux pays de l'OCDE et largement supérieure à celle des pays africains”Ama elmandhouma ejjibeyiya bdet tousel l 7doudha, b pression jibeyiya walla y9areb barcha bilden men mounadhdhamet etta3ewon wettanmiya w a3la barcha men elbilden el ifri9iya